बारबर्दिया, – बारबर्दिया नगरपालिकामा महिलाहरुको आर्थिक सशक्तीकरण तथा उद्यमशीलता प्रवर्द्धन गर्ने उद्देश्यले १० दिने दालमोट तथा चिप्स बनाउने तालिम सम्पन्न गरिएको छ।
गरिबी निवारणका लागि लघु उद्यम विकास कार्यक्रम अन्तर्गत बारबर्दिया नगरपालिका उद्यम विकास शाखाको आयोजनामा जेठ १ गतेदेखि १० गतेसम्म सञ्चालन गरिएको उक्त तालिममा वडा नं. १, ६ र ७ का १७ जना महिलाहरुको सहभागिता थियो। प्रशिक्षक सुन्दरी जोशी र गंगा सुनारले सहभागीहरुलाई विभिन्न प्रकारका दालमोट र चिप्स बनाउने सीप प्रदान गर्नु भएकाे छ ।
तालिम समापन कार्यक्रममा नगरप्रमुख छबिलाल थारुले महिलाहरुलाई सिकेको सीपलाई व्यवहारमा उतार्न आग्रह गर्दै, महिला हिंसा अन्त्यका लागि आयआर्जनको भूमिका महत्वपूर्ण हुने उल्लेख गर्नुभयो। उहाँले आफ्नो कार्यकालमा सयौं महिलालाई उद्यमी बनाउने योजना रहेको जानकारी दिनुभयो।
नगरप्रवक्ता तथा वडा नं. ४ का अध्यक्ष सीताराम योगीले उत्पादन भएको वस्तुहरुको बजार व्यवस्थापनमा नगरपालिका प्रतिबद्ध रहेको बताउनुभयो। बजारमा लैजान लाज, डर वा अप्ठ्यारो नमानी आत्मविश्वासका साथ अगाडि बढ्न सहभागी महिलालाई आग्रह गर्नुभयो।
वडा नं. १ का अध्यक्ष कैशालपति थारु र वडा नं. ७ का अध्यक्ष इन्द्रप्रसाद थारुले महिलाहरुलाई कानुनी प्रक्रिया पुरा गरी व्यवसायक बन्न प्रेरित गर्दै आवश्यक सहयोगमा नगरपालिका सधैं तयार रहेको बताउनु भयाे ।
उद्यम विकास शाखाकी प्रमुख पार्वती गौडेलले उद्यम प्रवर्द्धनका लागि पालिकाले सबै दृष्टिकोणबाट सहयोग गर्ने प्रतिबद्धता जनाउनु भयो। तालिमको अनुगमन तथा निरीक्षण समेत नियमित रूपमा गरिने जानकारी दिनुभयो।
सहभागी महिलाहरुले तालिमपछि उत्पादन गरिने वस्तुको बजार सुनिश्चितता तथा व्यवसायिक योजना निर्माणमा सहयोग माग गरेका छन्। समापन कार्यक्रममा प्रमुख प्रशासकीय अधिकृत टिकानाथ गोसाई, लेखा अधिकृत, महिला तथा बालबालिका शाखाका प्रमुख लगायतको सहभागिता रहेको थियो।
