बारबर्दिया,
बारबर्दिया नगरपालिकाका युवाहरुलाई योजना तर्जुमा प्रक्रियामा युवाको सहभागीताको बारेमा अभिमूखिकरण गरिएको छ । आर्थिक बर्ष २०८१/०८२का लागि नीति कार्यक्रम तथा बजेट तर्जुमा गर्ने समय नजिकीदै गर्दा युवाहरुलाई पालिका स्तरीय अभिमुखिकरण गरिएको हो ।
स्थानीय तहको बार्षिक योजना तथा बजेट तर्जुमा प्रक्रियामा स्थानीय नागरिक तथा युवाहरुको सक्रिय सहभागिता गराएर उहाँहरुको सवाललाई प्राथमिकतामा पार्न र स्थानीय विकास प्रक्रिया युवाहरुको सहभागिता बढाउनका लागि अभिमुखिकरण कार्यक्रमको आयोजना गरिएको छ । अभिमुखिकरणमा युवाहरुलाई योजना छनौट प्रक्रिया तथा चरणको बिषयमा जानकारी गराईएको छ । साथै युवाहरुलाई समुहमा बिषयगत रुपमा छलफल गराई शिक्षा, स्वास्थ्य सरसफाई, खानेपानी लगाएतका बिषयमा समस्या र समाधानको बारेमा प्रस्तुती गराईएको राधाकृष्ण थारु जनसेवा केन्द्रका अनुगमन, मुल्याँकन तथा अभिलेख अधिकृत जनक थापाले जानकारी गराउनु भएको छ । शिक्षालाई पुर्ण रुपमा निशुल्क, समयानुसारको प्रविधिक शिक्षा हुनु पर्ने, विद्यालय बालमैत्री किशोरकिशोरी मैत्री बनाउनु पर्ने लगाएतका सवालहरु योजना तर्जुमा प्रक्रियामा समाबेश गर्नका लागि स्थानीय जनप्रतिनिधि तथा सरोकारवालाहरुसंग अन्तरक्रिया गर्नु पर्ने कार्यक्रम रहेको छ ।
प्लान इन्टरनेशनल नेपाल र राधाकृष्ण थारु जनसेवा केन्द्रको साझेदारीमा बालिका सशक्त परियोजना अन्तरगत बारबर्दियाको जयनगरमा युवाहरुलाई अभिमुखिकरण गरिएको छ । अभिमुखिकरणमा उक्त परियोजनाका अनुगमन, मुल्याँकन तथा अभिलेख अधिकृत जनक थापा र कार्यक्रम अधिकृत संजय चौधरीले सहजिकरण गर्नु भएको छ । कार्यक्रममा बारबर्दिया युवा, नागरिक समाज, सञ्चारकर्मीहरु गरी करिब ३० जनाको सहभागिता रहेको थियो ।
