बर्दिया, — बारबर्दिया मा वन क्षेत्रमा निर्माण गरिएको संरचना हटाइएपछि विवाद उत्पन्न भएको छ। बारबर्दिया नगरपालिकाका नगरप्रमुख छबिलाल थारु ले सामाजिक सञ्जालमार्फत संरचना हटाउने कार्यप्रति असन्तुष्टि जनाउनुभएको हो।
नगरप्रमुख थारुले फेसबुकमा लेख्दै जनताको आवश्यकता र मागका आधारमा घाट क्षेत्रमा टहरा निर्माण गरिएको उल्लेख गर्नुभएको छ। उहाँले वर्षायाम र अत्यधिक गर्मीका समयमा सर्वसाधारणलाई सहजता होस् भन्ने उद्देश्यले जब्दी घाट, कतर्निया घाट, बम्बई माथिल्लो घाट र लठुवाघाटमा वन तथा निकुञ्जसँग समन्वय गरी टहरा निर्माण गरिएको दाबी गर्नुभएको छ। स्थानीय सरकारले निर्माण गरेका संरचना भत्काउने कार्य रोक्न उहाँले आग्रह समेत गर्नुभएको छ।
बारबर्दिया नगरपालिका वडा नं. ३ को लठुवाघाटस्थित मदन सामुदायिक वन क्षेत्रमा निर्माण गरिएको “मिसन पार्क” संरचना डिभिजन वन कार्यालयले हटाएको बताइएको छ। उक्त संरचना एक वर्षअघि करिब २२ लाख रुपैयाँ लागतमा निर्माण गरिएको दाबी गरिएको छ।
यता डिभिजन वन कार्यालय बर्दिया ले भने नगरपालिकाले अटेर गरेर वन क्षेत्रमा संरचना निर्माण गरेको र उक्त संरचना जोखिमयुक्त रहेको भन्दै हटाइएको जनाएको छ। वन क्षेत्र अतिक्रमण तथा सम्भावित जोखिमलाई ध्यानमा राखेर संरचना हटाई वन क्षेत्र सुरक्षित गरिएको कार्यालयको भनाइ छ।
नगरप्रमुख थारुले आफ्नो अभिव्यक्तिमा जनताको आवाज सुन्नुपर्ने आवश्यकता औंल्याउँदै स्थानीय तहका योजनाहरू जनभावना र आवश्यकताका आधारमा निर्माण गरिनुपर्ने बताउनुभएको छ।
यस विषयलाई लिएर स्थानीय तह र वन कार्यालयबीच मतभेद देखिएको छ।
