बर्दिया — बारबर्दिया नगरपालिकाले कृषि क्षेत्रको आधुनिकीकरण तथा किसानको जीवनस्तर उकास्नका लागि ५० प्रतिशत अनुदानमा आधुनिक कृषि औजार वितरण गरेको छ। नगरपालिकाले आयोजना गरेको विशेष कार्यक्रममा बारबर्दियाका २ सय २६ जना कृषकलाई पावर टिलर, मिनि पावर टिलर र सिँचाइ मोटरसहितका उपकरण वितरण गरिएको हो।
कुल ८७ वटा पावर टिलर, १०० वटा मिनि पावर टिलर र ३९ वटा सिँचाइ मोटर वितरण गरिएको जनाइएको छ। उक्त उपकरणहरू नगरपालिकाले २ करोड ४४ लाखको लागतमा खरिद गरेको हो, जसमा १ करोड २२ लाख रुपैयाँ नगरपालिकाले र बाँकी रकम लाभग्राही कृषकहरूले व्यहोरेका छन्।
कार्यक्रममा नगरप्रमुख छबिलाल थारुले परम्परागत खेती प्रणालीबाट आधुनिक कृषिमा रूपान्तरण आवश्यक भएको बताउँदै, युवाहरूलाई कृषि क्षेत्रमा आकर्षित गर्न यस्ता योजनाहरू ल्याइएको स्पष्ट गर्नु भयाे ।
त्यस्तै, नगरउपप्रमुख रत्नकुमारी पाण्डेले कृषकको आर्थिक सशक्तीकरणका लागि कृषि क्षेत्रमा लगानी बढाइरहेको उल्लेख गर्दै किसानलाई यस्ता योजनामा सहभागी हुन आग्रह गर्नु भयाे ।
प्रमुख प्रशासकीय अधिकृत टीकानाथ गोसाईले वितरण गरिएका औजारको सदुपयोग गरी यसको दीर्घकालीन लाभ लिन किसानलाई सुझाव दिनु भएकाे छ ।
कार्यक्रममा कृषि शाखा प्रमुख झलक खड्काले कार्यक्रमको उद्देश्य प्रस्तुत गर्दै अनुदानमा औजार पाउँदा किसानलाई बजार मूल्यभन्दा सस्तोमा सुविधा मिलेको जानकारी दिनु भयाे ।
पावर टिलरको मूल्य १ लाख ४८ हजार ९ सय र मिनि पावर टिलरको मूल्य ६३ हजार ९ सय रुपैयाँ तोकिएकोमा, कृषकहरूले ५० प्रतिशत अनुदानमा प्राप्त गर्नु भएकाे छ ।
