होमेन्द्र थापा
बर्दियामा भोलिदेखि सुरु हुने एसईई परीक्षाका लागि ३५ वटा परीक्षा केन्द्र तोकिएको छ। शिक्षा विकास तथा समन्वय इकाइ, बर्दियाका अनुसार, जिल्लाका ८८ सामुदायिक, २९ संस्थागत, र ५ प्रविधिक धारसहित ११७ माध्यमिक विद्यालयबाट ७,७६२ विद्यार्थी परीक्षामा सहभागी हुनेछन्।
कार्यालयका अनुसार, नियमिततर्फ ५,४७६ र ग्रेड वृद्धितर्फ २,२८६ परीक्षार्थी परीक्षा दिनेछन्। सामुदायिक विद्यालयबाट ७,११० र संस्थागत विद्यालयबाट ६५२ जना परीक्षार्थी सहभागी हुँदैछन्। तीमध्ये ११ जना अपांग विद्यार्थी तथा कारागारमा रहेका ६ जना परीक्षार्थीसमेत परीक्षामा सहभागी हुनेछन्।
जिल्लाका ८ स्थानीय तहमा निर्धारण गरिएका परीक्षा केन्द्रहरूमा केन्द्राध्यक्ष, कर्मचारी, र सुरक्षाकर्मी गरी ६५० जनशक्ति परिचालन गरिएको छ।
समन्वय इकाइका प्रमुख सूर्य बहादुर खत्रीले सम्पूर्ण तयारी पूरा भइसकेको जानकारी दिँदै विद्यार्थीलाई निर्धक्क परीक्षामा सहभागी हुन र सरोकारवालालाई परीक्षा स्वच्छ तथा मर्यादित रूपमा सम्पन्न गराउन सहयोग गर्न आग्रह गरेका छन्।
