होमेन्द्र थापा,
बर्दिया — बबई नदी किनारको वगर भूमिमा खेती गर्दै आएका किसानहरू यतिबेला पाकेको तरबुजा बिक्री गर्नमा व्यस्त छन्। पुस र माघ महिनामा रोपिएको तरबुजा अहिले पाकेर तयार भएपछि स्थानीय कृषकहरू बिहानदेखि बेलुकासम्म बजार खोज्नमा जुटिरहेका छन्।
गुलरिया नगरपालिका–४ का किसान फक्कु थारुका अनुसार, उनका परिवारका तीन सदस्य तरबुजा बिक्रीमा खटिएका छन्। उहाँ आफैं गाउँ–गाउँ डुलेर तरबुजा बेच्नुहुन्छ भने बुहारीले सडक छेउमा राखेर बिक्री गर्दै आउनु भएको छ। केही उपभोक्ता खेतमै वा घरमै पुगेर पनि तरबुजा किन्ने गरेका छन्।
यस्तै, अर्की किसान अनिता थारुको परिवार करिब तीन दशकदेखि बबई नदी किनारमा वगर खेती गर्दै आएको छ। हाल तरबुजा प्रतिकिलो ३० देखि ४० रुपैयाँसम्ममा बिक्री भइरहेको छ। अनिता थारुले नगदसँगै अन्नअनाज साटासाट गरेर पनि तरबुजा बेच्दै आएकी छन्।
कृषकहरूका अनुसार, विषादीमुक्त र अर्गानिक उत्पादनप्रति चेतना बढेसँगै वगर खेतीप्रति आकर्षण बढेको हो। गर्मी मौसममा तरबुजाको माग उच्च हुनु, वगर खेतीमा सिँचाइको खासै आवश्यकता नपर्नु, लागत कम र मुनाफा बढी हुनुजस्ता कारणले भूमिहीन तथा न्यून आम्दानी भएका सयौं किसान वर्षौंदेखि यो खेतीमा संलग्न छन्।
पण्डितपुर, बगही, जब्दी, खुन्टिपुर, गणेशपुर र रत्नापुर जस्ता गाउँहरूबाट यस वर्ष करिब २०० देखि २५० जना किसान वगर खेतीमा संलग्न रहेको स्थानीयले जानकारी दिएका छन्।
