बर्दिया — विश्व वातावरण दिवसको अवसरमा आज बारबर्दियासहित बर्दिया जिल्लाका बाढी जोखिम क्षेत्रहरूमा बाढी कृतिम घटना अभ्यास गरिएको छ। जोखिममा रहेका समुदायहरूमा विपद् प्रतिकार्य क्षमताको अभिवृद्धिका लागि पूर्व सूचना प्रणाली, खोज तथा उद्धार, र प्राथमिक उपचारसम्बन्धी जानकारी तथा चेतना फैलाउने उद्देश्यले अभ्यास कार्यक्रम गरिएको हो।
बारबर्दिया नगरपालिकाका विभिन्न बाढी सम्भावित स्थानहरू, वडा नं. १ दाङ्गपुर, वडा नं. २ ढुंग्रही, कुमरागाउँ र बेपत्तपुर, वडा नं. ३ घोरपिट्टा र गुरुवा गाउँ, तथा वडा नं. ११ जब्दीमा बिहान ८:३० बजेबाट १० बजे सम्म एकैसाथ कृतिम घटना अभ्यास गरिएको थियो।
यस अभ्यासमा सामुदायिक विपद् व्यवस्थापन समिति (CDMC) का पदाधिकारी तथा सदस्यहरूको सक्रिय सहभागिता रहेको थियो। बाढी जोखिम न्यूनीकरणका लागि गठन गरिएका CDMCलाई विभिन्न चरणमा तालिम तथा अभिमुखीकरण प्रदान गरिसकिएको थियो।
घटना अभ्यासमा जनप्रतिनिधि, रेडक्रसका प्रतिनिधि, सुरक्षा निकाय, र स्थानीय अगुवाहरूले समेत अवलोकन गरेका गर्नु भएकाे छ।
कार्यक्रमको सहजीकरण समुदायका लागि जलवायु उत्थानशील परियोजना अन्तर्गत गरिएको हो, जसमा प्राक्टिकल एक्सन नेपालको आर्थिक सहयोग र भेरी वातावरणीय विशिष्टता समूह (बी ग्रुप)को सञ्चालन रहेको थियो।
