होमेन्द्र थापा, बर्दिया
बर्दियाको मधुवन नगरपालिकामा जनप्रतिनिधिहरूसँग वन संरक्षणसम्बन्धी संवाद तथा अन्तरक्रिया कार्यक्रम सम्पन्न भएको छ। खाता समन्वय समितिको आयोजना, डिभिजन वन कार्यालय बर्दियाको समन्वय तथा मधुवन नगरपालिका र तराई भू–परिधि तथा संरक्षण कार्यक्रम नेपालगन्ज, बाँकेको आर्थिक सहयोगमा कार्यक्रम सञ्चालन गरिएको हो।
मानव–वन्यजन्तु द्वन्द्व न्युनिकरण गर्ने उद्देश्यले आयोजित कार्यक्रममा डिभिजन वन कार्यालय बर्दियाका प्रमुख विजय राज सुवेदीले वन संवर्द्धन प्रणालीमा आधारित वन व्यवस्थापन तथा राहत वितरण प्रक्रियाबारे सहजीकरण गर्नुभयो। उहाँले जनचेतना अभिवृद्धि, आनीबानीमा सुधार, धैर्य र सावधानी अपनाउने, बासस्थानको उचित व्यवस्थापन गर्ने तथा मानव बस्ती, खेतीपाती र वन क्षेत्रलाई पृथक राख्नुपर्ने आवश्यकता औंल्याउनुभयो।
त्यसैगरी बर्दिया राष्ट्रिय निकुञ्जका प्रमुख डा. अशोक कुमार रामले हात्ती र बाघको आनीबानी तथा वर्तमान व्यवहारबारे जानकारी गराउँदै पछिल्लो समय वन्यजन्तुहरूको चालचलन परिवर्तन हुँदै गएको उल्लेख गर्नुभयो। उनले यस विषयमा थप अध्ययन र अनुसन्धान आवश्यक रहेकोमा जोड दिनुभयो।
कार्यक्रममा मधुवन नगरपालिका वडा नं. ४ का अध्यक्ष वलीराम चौधरीले संरक्षणका नाममा विपन्न वर्गभन्दा ठूला व्यवसायीहरूले बढी लाभ उठाएको गुनासो गर्दै आगामी दिनमा सचेत र प्रभावकारी संरक्षण गतिविधि अघि बढ्ने विश्वास व्यक्त गर्नुभयो।
कार्यक्रममा मधुवन नगरपालिकाका जनप्रतिनिधि, सामुदायिक वन उपभोक्ता समिति तथा पत्रकारको सक्रिय सहभागिता रहेको आयोजकले जनाएको छ।
