काठमाडौं । नेकपा एमाले बागमती प्रदेशको अध्यक्ष कैलाश ढुंगेल विजयी हुनु भएको छ । आज शुक्रबार भएको निर्वाचनमा कृष्णप्रसाद दाहाललाई पराजित गर्दै ढुंगेल विजयी हुनु भएको हो ।
शुक्रबार राति सम्पन्न मतगणनाको अन्तिम परिणाम अनुसार ६ सय ९६ मत प्राप्त गरी ढुंगेल पहिलो अधिवेशनबाट निर्वाचित अध्यक्ष बन्नु भएको हो । रामेछापका ढुंगेल बागमती प्रदेश सरकारका पूर्व अर्थमन्त्री समेत हुनुहुन्थ्यो । ढुंगेलका निकटम प्रतिस्पर्धी दाहालले ४ सय ३९ मत प्राप्त गर्नु भएको छ ।
उपाध्यक्षमा दावा दोर्जे लामा विजयी हुनुभयो । उहाँले ६ सय १५ मत प्राप्त गर्नुभयो । यस्तै सचिवमा नवराज सिलवाल १ मतले विजयी हुनु भयो । सिलवालले ५ सय ६८ मत प्राप्त गर्दा हस्त पण्डितले ५६७ मत प्राप्त गर्नुभयो । यस्तै उपसचिवमा प्रेम कुमार महर्जन ५ सय ९९ र भक्त कुमारी लामा ५ सय ३६ मत लिएर विजयी हुनुभयो ।
सहमतिमा नेतृत्व चयन गर्ने प्रयास असफल भएपछि विद्युतीय मेसिनमार्फत् पार्टी कार्यालय च्यासलमा मतदान भएको थियो । मतदानमा १ हजार १ सय ३५ मत खसेको थियो । ढुंगेललाई महासचिव शंकर पोखरेलको समर्थन रहेको बताइएको छ ।
