होमेन्द्र थापा, बर्दिया
बर्दियाको गुलरिया नगरपालिकाबाट गाँजा नष्ट गर्ने अभियान सुरु गरिएको छ। बिहीवार गुलरिया नगरपालिका–२, खैरापुर क्षेत्रमा जिल्ला प्रहरी, जिल्ला प्रशासन, सशस्त्र प्रहरी तथा स्थानीयको सहभागितामा गाँजा फडानी गरिएको हो।
लागु औषध नियन्त्रण अभियान अन्तर्गत जिल्ला प्रशासन कार्यालयले सञ्चालन गरेको तीन महिने कार्ययोजनालाई विस्तार गर्दै गाँजा नष्ट अभियान सञ्चालन गरिएको प्रमुख जिल्ला अधिकारी रुद्रादेवी शर्माले जानकारी दिनुभयो।
बर्दिया जिल्लाका खेतबारीमा प्राकृतिक रूपमा गाँजा उम्रने गर्दछ। लागु औषधको सुरुवाती चरण आफै उम्रिएको गाँजाबाट हुने भएकाले युवामाझ चेतना फैलाउन तथा लागु औषधको न्यूनीकरण गर्न गाँजा नष्ट अभियान सञ्चालन गरिएको हो।
जिल्ला प्रहरी कार्यालय बर्दियाका प्रहरी उपरीक्षक केदार खनालका अनुसार यो अभियान जिल्लाभर १५ दिनसम्म सञ्चालन हुनेछ र जिल्लाका सबै प्रहरी चौकीसम्म पुर्याइने छ।
गुलरिया नगरपालिका–१ का वडा अध्यक्ष जोगीराम थारुले यो अभियानले युवा पुस्तालाई सकारात्मक सन्देश दिने तथा लागु औषध नियन्त्रणमा टेवा पुग्ने हुँदा यस अभियानमा सबै वडाबासीहरुलाई सक्रिय सहभागिता जनाउन अनुरोध गर्नुभएको छ।
