बर्दिया — बारबर्दिया नगरपालिकामा स्थानीय सरकारका प्रतिनिधि, सामुदायिक स्वयंसेवक तथा समुदायका सदस्यहरूका लागि यौन उत्पीडन, शोषण, दुर्व्यवहार तथा सुरक्षा सम्बन्धी एक दिने अभिमुखिकरण कार्यक्रम सम्पन्न भएको छ। कार्यक्रम बी ग्रुप र प्लान इन्टरनेशनल नेपालको सहयोगमा आयोजना गरिएको हो।
कार्यक्रममा सहजकर्ता मानवीर विश्वकर्माले यौन उत्पीडन, शोषण तथा दुर्व्यवहार हुने अवस्था, त्यसका कारण, रोकथामका उपाय तथा विपद्का समयमा देखिन सक्ने जोखिमबारे सहजीकरण गर्नुभएको थियो। उहाँले यस सम्बन्धी नेपालमा रहेको ऐन कानुन र कार्यविधिको बारेमा जानकारी गराउनु भएको छ । साथै यस बिषयमा राष्ट्रिय तथा अन्तराष्ट्रिय अभ्यासको चर्चा गर्नु भएको छ ।
सहभागीहरूलाई विभिन्न समूहमा विभाजन गरी समूह कार्यमार्फत छलफल समेत गराइएको थियो। छलफलका क्रममा यौन उत्पीडन तथा दुर्व्यवहार हुने अवस्था, त्यसका कारण, रोकथामका उपाय, विपद्का समयमा त्यसले पार्ने नकारात्मक असर, पीडितलाई सहयोग गर्ने तरिका तथा स्थानीय सरकार, समुदाय र स्वयंसेवकको भूमिका तथा जिम्मेवारीबारे विचार आदानप्रदान गरिएको थियो।
कार्यक्रमको समापन गर्दै बारबर्दिया नगरपालिकाका विपद् व्यवस्थापन तथा वन वातावरण समितिका संयोजक पुष्कर बिकले यौन उत्पीडन, शोषण र दुर्व्यवहारजस्ता घटनाविरुद्ध सबै पक्ष एकजुट भएर काम गर्नुपर्ने बताउनुभयो। उहाँले विशेषगरी विपद्का समयमा महिला, बालबालिका तथा जोखिममा रहेका समुदायको सुरक्षा सुनिश्चित गर्न स्थानीय तह, समुदाय र स्वयंसेवकबीच समन्वय आवश्यक रहेको उल्लेख गर्नुभयो। साथै यस्ता सचेतनामूलक कार्यक्रमले समाजमा सकारात्मक परिवर्तन ल्याउने विश्वास व्यक्त गर्नुभयो।
