- राजु गौतम
लेटाङ । लेटाङमा सम्पन्न वडास्तरीय ढल्केजोवन खसी कप फुटबल प्रतियोगिताको उपाधि वडा नम्बर १ ले जितेको छ । आज भएको फाइनल खेलमा वडा नं २ लाई सडनडेथमा ४–३ ले पराजित गर्दै वडा नं १ ले ढल्केजोवन खसी कपको उपाधि जितेको हो ।
शनिबार सुकेचौरी खेलमैदानमा सम्पन्न फाइनल खेलको निर्धारित समयमा दुबै टिमले गोलरहित बराबरी खेले पछि भएको टाइब्रेकर समेत बराबरी भएपछि खेल सडनडेथमा पुगेको हो ।
पहिलो पटक ठूलो प्रतियोगिताको विजेता बनेको वडा नं १ ले उपाधि स्वरुप खसी प्राप्त गर्न सफल भएको छ भने उपविजेता वडा नं २ ले सान्त्वना स्वरुप बोका प्राप्त गरेको छ । विजेता तथा उपविजेता टिमहरूलाई प्रमुख अतिथि लेटाङ पूर्व नगर प्रमुख तथा पूर्व राष्ट्रिय खेलाडी शंकर राई, पूर्व लेटाङ गाउँ पञ्चायत अध्यक्ष निरविक्रम किराँती लगायतका अतिथिहरूले पुरस्कार वितरण गर्नुभया ।
वडादशैंको उपलक्ष्यमा सुकेचौरी खेलमैदान संरक्षण समितिको आयोजनामा असोज २८ गतेबाट शुरु प्रतियोगितामा लेटाङका नौ वटै वडाको सहभागिता रहेको थियो । प्रतियोगितामा ३० वर्ष भन्दा बढी उमेरका खेलाडीले मात्र सहभागिता जनाएका थिए ।
