बर्दिया
बर्दिया जिल्लाका विद्यालयहरुमा विद्यालय खानेपानी सरसफाई तथा स्वच्छता कार्यविधि कार्यान्वयनका लागि सरोकारवालाहरुलाई अभिमुखीकरण गरिएको छ । जनप्रतिनिधि, वास फोकलपर्सन, योजना शाखा प्रमुख, शिक्षा शाखा प्रमुख, संघ संस्थाका प्रतिनिधि, शिक्षकलगाएतलाई विद्यालय खानेपानी सरसफाई तथा स्वच्छता कार्यविधिलाई स्थानीयकरण गरी कार्यान्वयनमा सहयोग पुर्याउन अभिमुखीकरण गरिएको हो ।
शिक्षकहरुले आफ्नो विद्यालयको खानेपानी सरसफाई तथा स्वच्छताको अवस्था बारे जानकारी गराई यसको कार्यान्वयनका लागि स्वयम विद्यालय परिवार र सरकारी तथा दातृनिकायहरुको भूमिकाको विषयमा छलफल गर्नु भएको छ । विद्यालयहरुमा खानेपानी तथा सरसफाईको अवस्थामा सुधार हुदै गएको र धेरै जसो स्थानमा सुधारात्मक अवस्थामा रहेको बताउनु भएको छ ।
उक्त अभिमुखीकरण कार्यक्रम तीन दिन संचालन भएको छ । अभिमुखीकरणको पहिलो दिन नगरउपप्रमुख, सामाजिक विकास समितिसंयोजक, नगरप्रबक्ता, वास फोकलपर्सन, योजना शाखा प्रमुख र संघ संस्थाका प्रतिनिधिहरुको सहभागिता रहेको थियो । अभिमुखीकरणको दोस्रो दिन परियोजना संचालनमा रहेको ३३ वटा विद्यालयका शिक्षा र परियोजना संचालन गरेका पालिकाका शिक्षा शाखा प्रमुख तथा प्रनितिनिधिको सहभागीता रहेको थियो । अभिमुखीकरणको तेस्रो दिन पहिलो र दोस्रो दिन तालिममा सहभागी भन्दा फरक शिक्षक तथा शिक्षा शाखा प्रमुखहरुको सहभागिता रहेको थियो ।
जनप्रतिनि तथा वास फोकलपर्सन र योजनाशाखा प्रमुखहरुसंग विद्यालय खानेपानी सरसफाई तथा स्वच्छता कार्यविधि स्थानीयकरण गरेपछि यसको कार्यान्वयन र परियोजना नभएको विद्यालयहरुमा लैजाने विषयमा छलफल गरिएको छ । उहाँहरुले कार्यान्वयनलाई प्रभावकारी बनाउने र अनुगमनका कार्यक्रमलाई निरन्तरता दिने बताउनु भएको छ ।
शिक्षक तथा शिक्षा शाखा प्रमुखहरुलाई विद्यालयमा कार्याविधिलाई प्रभावकारी बनाउनका लागि शिक्षक तथा विद्यालय परिवारले खेल्नु पर्ने भूमिकाको बिषयमा छलफल गरिएको छ । खानेपानी सरसफाई तथा स्वच्छता कार्यविधिको बिषयमा जानकारी तथा छलफल प्रशिक्षक चन्द्रबहादुर विष्टले गर्नु भएको परियोजनाका तालिम तथा पैरवी अधिकृत दुर्गा चौधरीले जानकारी गराउनु भएको छ ।
बारबर्दिया र गुलरिया नगरपालिकामा दशदश वटा विद्यालय, गेरुवा गाँउपालिकाको ६ वटा विद्यालय, ठाकुबाबा नगरपालिकाको ५ वटा विद्यालय र मधुवन नगरपालिकाको २ वटा विद्यालयमा गरी बर्दिया जिल्लाको ५ वटा पालिकामा वास गेन परियोजना अन्तरगत कार्यक्रम संचालन भईरहेको छ । उक्त परियोजना मार्फत विद्यालय खानेपानी सरसफाई तथा स्वच्छता कार्यविधिलाई स्थानीयकरण गरी कार्यान्वयन गराउनका लागि सहजिकरण तथा सहयोगका गतिविधिहरु संचालन गर्दै आएको छ ।
बेस बर्दिया, वाटर एड, राष्ट्रिय अपाङ्ग महाँसंघ, एन.एफ.सि.सि.को साझेदारीमा संचालित वास गेन परियोजना संचालनमा छ । परियोजनाको बर्दिया जिल्लाको ३३ वटा विद्यालयमा कार्यक्रम संचालन भईसरहेको छ ।
