बारबर्दियामा युवाहरुको सवाल योजना तर्जुमा प्रक्रियामा समावेश गराउन सहयोग पुर्याउने उद्देश्यले युवा तथा सरोकारवालाबीच अन्तरक्रिया कार्यक्रम सम्पन्न भएको छ। यो कार्यक्रम प्लान इन्टरनेसनल नेपाल र राधाकृष्ण थारु जनसेवा केन्द्र, गुलरिया बर्दियाद्वारा सञ्चालित सशक्त बालिका परियोजना अन्तर्गत आयोजना गरिएको हो।
अन्तरक्रिया कार्यक्रममा बारबर्दियाका विभिन्न वडाका अध्यक्षहरूले युवाहरुलाई आगामी आर्थिक वर्षका लागि योजना तर्जुमा प्रक्रियामा समावेश गर्ने प्रतिबद्धता जनाएका छन्। साथै, वडा अध्यक्षहरूले युवाहरुलाई वडासँग सक्रिय सम्पर्क र समन्वय राख्न सुझाव दिएका छन्। सीमित स्रोतसाधनका बीच सबैलाई सम्बोधन गर्ने चुनौती रहेको उल्लेख गर्दै, आगामी दिनमा युवाहरुको सवालमा निरन्तर काम गर्ने प्रतिवद्धता पनि व्यक्त गरेका छन्।
कार्यक्रममा सहभागी युवाहरूले समाजिक सञ्जालको दुरुपयोग रोक्न, लैङ्गिक र अल्पसंख्यक युवालाई सम्मानजनक दृष्टिकोणले हेर्न, अपाङ्गता भएका व्यक्तिहरूलाई योजना तर्जुमा प्रक्रियामा समावेश गर्न, महिलालाई प्राथमिकतामा राख्न, रोजगारी र स्वरोजगारका कार्यक्रमहरू ल्याउन, सीपमूलक तथा जीवन उपयोगी शिक्षामा जोड दिन र युवा लक्षित कार्यक्रम अघि बढाउन सुझाव दिएका छन्।
कार्यक्रममा बारबर्दियाका वडा नम्बर १, २, ४, ५ र ७ का वडा अध्यक्ष तथा प्रतिनिधिहरू, महिला तथा बालबालिका शाखा प्रमुख, युवा सञ्जाल, अपाङ्ग सञ्जाल, लैङ्गिक तथा अल्पसंख्यक समूह, नागरिक समाज र सञ्चारकर्मीहरूको उपस्थिति रहेको थियो। कार्यक्रमको सहजीकरण राधाकृष्ण थारु जनसेवा केन्द्रका कार्यक्रम अधिकृत संजय चौधरीले गरेका थिए भने सुपरभाइजर रामकली थारुले कार्यक्रमबारे जानकारी दिएका छन्।
