बर्दिया – संचार माध्यममा दलित महिलाको पहुँच अभिवृद्धिका लागि संचारकर्मीहरूको भूमिकाबारे बर्दियामा एक अन्तर्क्रिया कार्यक्रम सम्पन्न भएको छ। दलित महिला संघ बर्दियाको आयोजनामा भएको कार्यक्रममा जिल्लाका सक्रिय पत्रकारहरूको सहभागिता रहेको थियो।
कार्यक्रममा दलित महिला संघ बर्दियाकी अध्यक्ष हिमा सुनारले अधिकांश दलित महिलाहरू घरेलु हिंसाको शिकार भइरहेको उल्लेख गर्दै, उनीहरूको न्यायमा पहुँच सुनिश्चित गर्न संचारकर्मीहरूले प्रभावकारी भूमिका खेल्नुपर्ने बताउनुभयो। उहाँले शिक्षा, स्वास्थ्य, सरकारी निकायजस्ता क्षेत्रमा दलित महिलाहरूको उपस्थितिमा वृद्धि हुन आवश्यक रहेको पनि जोड दिनुभयो।
दलित महिला संघका अनुसार, ८२ प्रतिशत दलित महिलाहरू घरेलु हिंसाको शिकार भइरहेका छन्। चालु आर्थिक वर्षको हालसम्म ८९ जनाले घरेलु हिंसाका कारण ज्यान गुमाएका छन्। त्यस्तै, १२ दशमलव १६ प्रतिशत दलित महिलाहरू बलात्कारको शिकार भएको तथ्यांक प्रस्तुत गरिएको छ।
कार्यक्रममा संघले आफ्नो दुई दशकको यात्रा उल्लेख गर्दै छुवाछूत, जातीय विभेद, र दलित महिलाहरूको न्याय र आर्थिक समृद्धिका लागि सञ्चालन गरिएका कार्यक्रमहरूको जानकारी गराएको थियो। संघले गुलरिया, मधुवन, बाँसगढी नगरपालिका र बढैयाताल गाउँपालिकामा काम गर्दै आइरहेको र दलित महिलाहरूलाई समूहमा एकीकृत गर्दै बीउ पुँजी प्रदान गरी उनीहरूको आर्थिक उपार्जनमा सहयोग गरिरहेको बताइएको छ।
कार्यक्रममा उपस्थित पत्रकारहरूले दलित महिला लगायत सीमान्तकृत समुदायहरूको आवाज बुलन्द गर्न तयार रहेको बताएका छन्। पत्रकार महासंघ बर्दियाका अध्यक्ष निर्मल घिमिरेले संचार माध्यमले सधैँ सकारात्मक भूमिका खेल्ने र सीमान्तकृतहरूको पक्षमा कलम चलाउने प्रतिबद्धता व्यक्त गर्नुभयो।
कार्यक्रमले दलित महिलाहरूको अधिकार, न्याय, र पहुँच सुनिश्चित गर्न संचारकर्मीहरूको सक्रियता आवश्यक रहेको निष्कर्ष निकालेको छ।
