लेटाङ । लेटाङमा जारी दोस्रो मेयर कप फुटबल प्रतियोगिता अन्तरगत आइतबार भएको चौथो क्वाटरफाइनल खेलमा विजयी हुँदै वडा नम्बर ४ सेमीफाइनलमा प्रवेश गरेको छ । आइतबार वडा नं ५ लाई २–१ ले पराजित गर्दै वडा नं ४ ले सेमिफाइनलमा स्थान बनाएको हो । निकै प्रतिस्पर्धात्मक खेलमा वडा नं ४ को जितमा सुवास राई र अनिस श्रेष्ठले गोल गरे भने वडा नं ५ का गणेश कार्कीले सान्त्वना गोल फर्काए । खेलको म्यान अफ दी म्याच वडा नं ४ का सौलेन लामा घोषित भए ।
आइतबारको खेलसँग मेयर कप फुटबलको सेमीफाइनल समीकरण पुरा भएको छ । वडा नम्बर ४, ६, ३ र २ ले सेमीफाइलनमा स्थान बनाएका हुन् । अब वडा नम्बर ४ ले बुधबार हुने दोश्रो सेमीफाइनल खेलमा वडा नम्बर २ को सामना गर्नेछ । त्यसअघि मंगलबार हुने पहिलो सेमिफाइनलमा वडा नं ६ र वडा नं ३ बीच प्रतिस्पर्धा हुनेछ । नगरका ९ वटै वडा सहभागि प्रतियोगिताको फाइनल खेल असार २२ गते शुक्रबार हुनेछ ।
प्रतियोगिताबाट छनौट भएका खेलाडीहरुलाई समेटेर नगर स्तरीय फुटबल टीम तयार गर्ने योजना रहेको नगर खेलकुद विकास समितिका सदस्य सचिव कृष्णराज राईले जानकारी दिनुभयो । प्रतियोगितामा उपाधि विजेता टीमले नगद १ लाख ३५ हजार र उपविजेता टीमले ६५ हजार पुरस्कारसहित ट्रफि पाउने छन् ।
