मोरङ । एकलौटीरुपमा साधारणसभा गर्न लागिएको भन्दै उपभोक्ताहरुले विरोध जनाएपछि सुन्दरहरैंचा ८ स्थित सलकपुर खानेपानी उपभोक्ता तथा सरसफाई समितिको साधारणसभा स्थगित गरिएको छ । शनिबार बोलाइएको साधारणसभामा पुगेका केही उपभोक्ताहरुले नेतृत्वले एकतर्फिरुपमा आफ्नो पक्षका मान्छेलाई मात्र खबर गरेर साधारणसभा गर्न लागेको भन्दै विरोध गरेपछि साधारणसभा स्थगित गरिएको हो ।
साधारणसभा सुरु हुनसाथ स्थानीय रामकृष्ण खड्का लगायतका उपभोक्ताले हाजिर गराउँदै गरेको माइन्यूट नियन्त्रणमा लिएर एकलौटीरुपमा साधारणसभा गर्न लागिएको भन्दै विरोध जनाएका थिए । साधारणसभामा विरोध हुन थालेपछि गणपुरक संख्या नपुगको भन्दै साधारणसभा स्थगित गरिएको हो । साथै विधान संंशोधन गर्नुपर्ने माग पनि उठेको छ ।
हालको नेतृत्वले अधिकांश आफ्नो पक्षका मानिसहरुलाई मात्र बोलाएर गुपचुपमा नयाँ समिति गठन गर्ने उद्देश्यले नाम मात्रको साधारणसभा गर्न लागेकाले विरोध जनाएको खड्काले जानकारी दिनुभयो । खानेपानी उपभोक्ता समितिका टोली प्रमुखहरुलाई नै थाहा नदिएको र सबै उपभोक्तालाई जानकारी समेत नगराएको पाइएको खड्काको भनाइ छ । आफ्ना पक्षका मानिसहरुलाई मात्र छानेर बोलाइएकाले साधारणसभामा गणपुरक संख्या समेत नपुगेको उहाँको भनाइ छ ।
करिव २४ सय उपभोक्ता रहेकोमा ४ सय ९१ जना मात्र उपस्थित भएको खड्काले जानकारी दिनुभयो । त्यसमा पनि कतिपय उपभोक्ताहरु एकलौटीरुपमा साधारणसभा गर्न लागिएको थाहा पाएर रोक्नका लागि पुगेकाहरु रहेको उहाँको भनाइ छ । उपभोक्ताहरुले विरोध जनाएपछि गणपुरक संख्या नपुगको भन्दै ३ महिनाभित्र साधारणसभा बोलाउने निर्णय गर्दै साधारणसभा स्थागित गरिएको छ ।
यसैबीच साधारणसभा स्थगित हुनुअघि खानेपानी आयोजनाको नवनिर्मित खानेपानी टंकीको उद्घाटन गरिएको छ । संघीय सांसद सुनील शर्माले टंकी उद्घाटन गर्नुभयो । कार्यक्रममा संस्थापक अध्यक्ष लोकप्रसाद संग्रौला सहित ३ जनालाई सम्मान गरिएको थियो ।
