मोरङ । लेटाङ नगरपालिका क्षेत्रमा प्रहरीले लागुऔषध नियन्त्रणका लागि सर्च अभियानलाई तीव्रता दिएको छ । इलाका प्रहरी कार्यालय लेटाङबाट खटिएको प्रहरी टोलीले दैनिक जसो नगरका विभिन्न ठाउँमा लागूऔषध प्रयोगकर्तालाई लक्षित गरि सर्च अभियान चलाउन थालेको छ । यसरी सर्च अभियानका क्रममा लागुऔषध तथा प्रतिवन्धित औषधिसहित प्रहरीले विभिन्न व्यक्तिलाई पक्राउ गरेको छ । मंगलबार राति मात्र लेटाङ नगरपालिकाको जाँते क्षेत्रमा प्रहरीले गरेको सर्च अभियानका क्रममा प्रतिवन्धित औषधि र गाँजासहित ३ जनालाई पक्राउ गरेको छ ।
इलाका प्रहरी कार्यालय लेटाङका प्रहरी निरीक्षक विकास थपलियाको कमाण्डमा खटिएको प्रहरी टोलीले लेटाङ ९ जाँतेका दिवाहाङ राई र पवन बाग्दासलाई ५ सय ६४ ग्राम गाँजासहित पक्राउ गरेको छ । उनीहरुको साथबाट प्रतिवन्धित औषधि स्पासपेन २०० सय चक्की र ट्रामाडोल २०० चक्की पनि बरामद गरेको प्रहरीले जनाएको छ । उनीहरुलाई लागुऔषध गाँजाको कारोवार गरेको आरोपमा मुद्दा चलाइएको इलाका प्रहरी कार्यालय लेटाङका प्रहरी निरीक्षक विकास थपलियाले जानकारी दिनुभयो । 
यस्तै मंगलबार राति नै लेटाङ ९ का अभिशेक दर्जीलाई प्रहरीले प्रतिवन्धित औषधि ट्रामाडोल ४ सय ४५ चक्की, स्पासपेन ५ सय ५३ चक्की र लागुऔषध खाने प्लाष्टिकको बट्टासहित नियन्त्रणमा लिएको जनाएको छ । दर्जीलाई औषधि व्यवस्था विभागमा आवश्यक कारवाहीका लागि जिम्म लगाएको प्रहरीले जनाएको छ । यस्तै प्रहरीले लेटाङ ८ बाट २ जनालाई प्रतिवन्धित औषधि ट्रामाडोल र स्पासपेनको खोल सहित पक्राउ गरेको छ । उनीरुको साथबाट खोल मात्र बरामद भएकाले हाललाई सुधार केन्द्र पठाउने गरि परिवारको जिम्मा लगाइएको प्रहरीले जनाएको छ ।
लागुऔषध नियन्त्रणका लागि सर्च अभियानलाई तीव्रता दिएको लेटाङ प्रहरीले शनिबार मात्र लेटाङ ३ बाट प्रतिवन्धित औषधिसहित एकजनालाई पक्राउ गरेको थियो । लेटाङ क्षेत्रमा पछिल्लो समय लागुऔषध दुव्र्यसनीहरुको संख्या बढिरहेको छ । लेटाङ नगरपालिकाले सञ्चालन गरेको सार्वजनिक सुनुवाई कार्यक्रममा समेत नगरवासीले लागुऔषधि दूव्र्यसन नियन्त्रणमा नगरपालिकालाई विशेष कार्यक्रम सञ्चालन गर्न आग्रह गरेका थिए ।
