होमेन्द्र थापा, बर्दिया
माघ ११ गते
७३ औँ विश्व कुष्ठरोग दिवसको अवसरमा बर्दियाको गुलरिया नगरपालिकाभित्र रहेका कुष्ठरोगका बिरामीलाई सम्मान स्वरूप न्यानो कपडा तथा सरसफाइ सामग्री वितरण गरिएको छ ।
आइएनएफ नेपाल शाइनिङ अस्पताल बाँकेको सहयोगमा जिल्ला स्वास्थ्य कार्यालय गुलरिया, बर्दियाको समन्वयमा गुलरिया नगरपालिकाभित्र रहेका २० जना कुष्ठरोगका बिरामीलाई सम्मान गर्दै न्यानो कपडा र सरसफाइ सामग्री वितरण गरिएको हो ।
विश्व कुष्ठरोग दिवसका अवसरमा आयोजित कार्यक्रममा समयमै कुष्ठरोग पहिचान गरी उपचार गरे रोग पूर्ण रूपमा निको हुने स्वास्थ्यकर्मीहरूले बताएका छन् । कुष्ठरोगको उपचारका लागि बिरामीले रोगको प्रकृति अनुसार ६ महिनादेखि १२ महिनासम्म औषधि सेवन गर्नुपर्ने र आवश्यक औषधि स्वास्थ्य संस्थाबाट निःशुल्क उपलब्ध हुने जानकारी दिइएको छ ।
स्वास्थ्य कार्यालय बर्दियाका कुष्ठरोग कार्यक्रम शाखाका सम्पर्क व्यक्ति जीवन रजौरेले चालू आर्थिक वर्ष २०८२/०८३ को पुष महिनासम्म जिल्लामा १२ जना नयाँ कुष्ठरोगका बिरामी पहिचान भएको बताउनु भएको छ । गत आर्थिक वर्ष २०८१/०८२ मा भने ४८ जना नयाँ बिरामी पहिचान भएका थिए । हाल जिल्लामा ४९ जना कुष्ठरोगका बिरामीले नियमित रूपमा औषधि सेवन गरिरहेका छन् ।
गुलरिया नगरपालिका वडा नं. १२ भैसाहीका श्यामबहादुर थारुले २०७८ देखि २०८० सालसम्म कुष्ठरोगको औषधि सेवन गरी पूर्ण रूपमा निको भएको अनुभव सुनाउनुभयो । आफू र आफ्नी छोरी दुवैलाई कुष्ठरोग लागेको भए पनि बाँके जिल्लाको नेपालगञ्जस्थित आइएनएफ नेपालद्वारा सञ्चालित शाइनिङ अस्पतालमा दुई वर्ष नियमित उपचारपछि शारीरिक अंगभंग हुनबाट जोगिन सफल भएको उहाँले बताउनुभयो ।
